Дата публикации: 04.04.2020

Беседует Алёна Нестерова

Перевод интервью (см. тут)

– Настя, бур рыт, чолӧмала тэнӧ выль небӧгӧн. Шензя, кызвыныслӧн мартыс йитчӧма вирускӧд да карантинкӧд, а тэнсьыд лист боктӧ неважӧн лыдди да, аддзи, мартнас тэнад сьӧрсьӧн-бӧрсьӧн кык небӧг петӧма. Зэв тай тэ зiль. Нӧшта казялi, мый небӧгъясыс ёна торъялӧны ӧта-мӧдсьыныс. Висьтышт та йылысь.

– Аттьӧ, Алёна! Збыль, рака тӧлысьын петiс кык небӧг, кӧнi индöма менам ним. Но ӧти небӧгыс абу дзик менам – сiйӧс лӧсьӧдiс да ас сьӧм вылас печатайтiс Удмуртияса гижысь Владимир Васильевич Котков. Cылы кажитчисны менам кывбуръяс да босьтчис вуджӧдны найӧс аслас кыв вылас. Зэв и öдйö артмöма вуджöднысö. Небöгас нöшта эмöсь менам серпасъяс. Любö лыддьыны вуджöдöм кывбуръяссö – тшöкыда паныдасьöны тöдса кывъяс, öд коми да удмурт кывъяс матысаöсь. Со и нимсö вуджöдтöг гöгöрвоан: «Кытын будэ марьямоль?»

Мöд небöгыс петiс роч кыв вылын «Стрекоза» издательствоын – «Маленький единорог» нима. Тайö дзолюкъяслы мойд, зэв югыд да мича серпасъяса, нöшта быд лист бок аслас кöра. Шуам, лыддян оз йылысь, ниртыштан лист боксö, апыштан – озлöн кöрыс кылö.

– Казьтывсьӧ, Маршаковкаын кольӧм воӧ нимӧдiм тэнсьыд «Цветущий ёжик» роч кывбура небӧг, таво, неважӧн – «Вильыш Урпи» коми кывбура небӧг. Лыддян да, кыкнан кывнас кокньыда гижан. А збыльвылас, кыдз авторлы, кодар кывнас гижны кокньыдджык и мыйла? Кодарнас тшӧкыдджыка гижан?

– Роч кывбур лыдыс менам унджык. Кокньыдджык гижны рочнас. Гашкö, сы вöсна, мый ме гöгöр уна роч йöз. Таысь öтдор, рочнас öдйöджык аддзан рифма либö колана кыв-синоним да с.в. Но эмöсь темаяс, код вылö меным окота гижны сöмын комиöн. И гöгöрвоа, мый рочнас та йылысь менам оз артмы висьтавны сэтшöм мичаа да джуджыда. Шуам, вöр-ва йылысь либö кутшöмкö лоöмтор йылысь, кодi йитчö менам чужанiнкöд да коми кывъя рöдвужкöд.

– А кодар кывйыс тэнад чужан кыв? Тӧдӧны-ӧ челядьыд коми кывсӧ, лыддьӧны-ӧ коми кывъя тэнсьыд да мукӧд авторлысь гижӧдъяс?

– Чужан кывйыс менам коми. Челядькӧд велӧдам коми кыв, лыддьысям и рочӧн, и комиӧн. Но карын олiгӧн да роч ёртъяскöд налы коминас сьöкыд сёрнитнысö, да и яндысьöны мукöддыйи.

– Тшöкыда лист бок вылад пыравла да, тшӧкыда аддза и выль кывбур. Бара жӧ чайтсьӧ, быттьӧ ӧдйӧ ставыс тэныд воӧ. Збыль-ӧ сiдз? Дыр-ӧ уджалан кывбур вылас, Кыв вылас? Кысь чужӧ кывбур мӧвпыс? Вежлалан-ӧ гижӧмасӧ? Дыр-ӧ куйлӧдан йӧзӧдтӧдз?

– Кывбурыс воӧ кӧ – ӧдйӧ локтӧ юрö. Кысь чужö мöвпыс? Олöмысь, быдсяма вöвлöмторысь, либö челядь казяласны кутшöмкö шемöс. Мукöддырйи сьöрсьöн-бöрсьöн чужöны строчкаяс. А овлö, öти мöвп воас, и дыр сiйöс юрын быгляла, мöвпала, мый позьö таысь вöчны. Кывбурсö помала кö гижны, некымын вежон сэсся ог лыддьы – мед «воö». Бöрти видзöда: ставыс-ö лючки, оз-ö ков мыйкö вежны да бурмöдны.

– Ми, лыддьысьысьяс, кылiм тэ йылысь неважӧн. Тэ кыськӧ другӧн лоин литература олӧмас и зэв азыма босьтчин гижны. Кӧн та дырасӧ дзебсясин? Мыйла кыскис юксьыны гижöднад? Либӧ тэ водзсӧ эн гиж, да ӧнi буретш петiс ставыс, мый йылысь мӧвпалiн, гижӧдӧн?

– Юксьы миянкӧд, кыдз ставсӧ удитны? Висьтав рецепт, кыдз дженьыд кадӧ тӧрӧдны унатор. Тэ и кысян, и челядькӧд ноксян, вӧрӧ ветлан, гижан, кывкутана удж вылын уджалан. Кор ставсӧ удитан?

– Колö быд прöст кад планируйтны. Шуам, ме быд асыв, кор ставöн узьöны, дас – дас вит минут лыддьыся да рытнас нöшта. Шойччан лунö челядькöд нокся, öтвыв гортса удж накöд вöчам, öтлаын ворсам, гуляйтам, лыддьысям, сэсся быдöн ассьыс уджсö вöчö – кодлы мый кажитчö. А удж вылö мунiгöн да рытнас гортö мунiгöн туйын уна кывбур-мöвп юрö воö.

– Тэ ёнджыка гижан челядьлы. А мый ачыд радейтiн лыддьыны ичӧтдыр кадӧ, мый ӧнi сетан лыддьыны аслад челядьыдлы?

– Ичöтдырйи и мойд, и кывбур радейтлi лыддьыны, и приключенньöяса небöг. Челядькöд лыддям и классика гижöдъяс, и выль авторъяслысь небöгъяс. Старайтча, мед уна сикас небöг лыддисны: вöр-ва йылысь, мойдъяс, и важ и öнiя олöм йылысь. Миян небöг джадж вылын эм и важсьыс-важ небöгъяс, кодöс на менам мамöй да ме лыддьылiм, а эм и дзик выль небöгъяс, кодöс гижисны менам тöдса том авторъяс. Дерт, и журналъяс лыддям. На лыдын – миян республикаса «Радуга» да «Би кинь».

Ульяновскын форум вылын челядьлы гижысь Зуля Стадниккӧд

– Кутшӧм ногӧн олӧмыд йитчӧма небӧгаинкӧд? Гашкӧ, казьтыштан тешкодь, мӧрччана лоӧмтор?

– Миян челядьдырйи небагаинъяс вöлiны гажтöмöсь да весиг шуштöмöсь. Ме вöлi быдöн полыша сэтöн ветлöдлыны. Зэв нимкодь, мый öнi небöгаинъяс мичаммисны, гажаммисны, локтан – быттьö театрö либö музейö веськалан. Помнита, ыджыдджык нывкöд, кор сылы вöлi ар нёль, медводдзаысь пырим карса небöгаинö, сiйö паськöдiс синсö: «И тайö став небöгсö позьö дон босьттöг гортад нуны да лыддьыны?!»

– А мый тэнад йитчӧма буретш Маршаковкакӧд?

– Маршаковкакöд ми важöн ёртасям. Танi уджалöны зэв шань да авъя йöз. Найö радейтöны оз сöмын небöг, но и лыддьысьысьöс и век радöсь отсавны сылы. Со и менсьым небöгъясöс нимöдiм Маршак нима библиотекаын. И таысь ыджыд аттьö тiянлы! Нöшта «Зиль-зёльын» олöны меöн кыöм чуньвыв чачаяс – небагаинын уджалысьяс вöчисны на отсöгöн дзонь театр да ворсöны дзолюкъяскöд.

– Мый сиан ставӧнлы, код кутас тайӧ сёрнисӧ лыддьыны?

– Сиа дзоньвидзалун, шуд да унджык лыддьысьны челядькöд, öд небöгысь позьö сымда шензьöданатор аддзыны.

– Виччысям тэнö челядьыдкӧд С.Я. Маршак нима небӧгаинын. Бара на ӧд пыралан?

– Ёна и кöсъям волыны! Став небöгсö, мый Маршаковкаысь босьтлiм, лыддим.

Сёрнитіс Алёна Нестерова