 |
Дорогие наши прекрасные читательницы, Пусть вас окружает забота и уважением сильной половины человечества. Пусть вокруг будут цветы, книги и музыка, а внутри – весна, гармония и стихи! |
Национальная детская библиотека Республики Коми им. С.Я. Маршака к Международному женскому дню подготовила подборку стихов коми писателей о маме. В подборку вошли стихи Альберта Ванеева, Юрия Васютова, Владимира Попова, Алесандры Мишариной, Серафима Попова, Василия Лодыгина и многих других поэтов на коми языке.
Мамлы сиӧм кывбуръяс (Стихи коми поэтов о маме)
Ванеев Альберт. Мам йылысь кыв
Тӧждысьӧ медъёна,
Содтӧ мывкыд-сямӧс:
Медся югыд шонді –
Менам муса мамӧй!
Нэмсӧ вермас видзны
Муслун сьӧлӧм шӧрас.
Мелілун да мичлун
Мамлы чукйӧн тӧрӧ.
Кӧсъя сідзи овны,
Велӧдчыны сідзи,
Некор мед эз ковлы
Мамлы менӧ видны.
Мамлӧн праздник лунӧ
Кӧсъя сылы сины,
Медым шуда нюмӧн
Югъяласны синъяс.
Васютов Юрий. Мам
Мамӧ вурис меным дӧрӧм,
Мамӧ шӧраліс нянь шӧрӧм,
Мамӧ мыськис менсьым чужӧм,
Мамӧ пуис чӧскыд ужин,
Мамӧ шебраліс да мойдіс,
Мамӧ орччӧн вӧлі войбыд,
Мамӧ дорын ме ог дур,
Менам мамӧ медся бур.
Елфимова Анжелика. Мамуклы // Аддзысьлытӧдз (2002)
Кутшӧм эськӧ кывъяс
тэныд вичмӧдны,
Кодкӧд эськӧ
ӧткодявны тэнӧ?
Ог тӧд.
Ме ӧд век на тэнад
ичӧт ныв,
Кӧть и ачымӧс нин олӧм
важӧн венӧ.
Кымын аттьӧ
висьтавны тэд вунӧді
Да и кымынӧс на
вунас шуны...
Мырдӧн зіля тувччавны
кок туйӧдыд,
Сӧмын, буракӧ, ог вермы
некор суны...
Елфимова Анжелика Мам… Ме бара звӧнитны эг лысьт… // Вемӧсӧн ли вӧтӧн… (2010)
Мам… Ме бара звӧнитны эг лысьт.
Ме тэнад гӧлӧс кӧрысь повзи.
Ӧд сійӧ та дыранад совзис,
А бӧрсӧ юммӧднысӧ кысь…
Мам… Ме бара тэ дінӧ эг лок,
Кӧть эськӧ кӧсйи. Збыльысь кӧсйи.
Ме тӧда — тэныд вывті шог,
Ме ачым тайӧ шогсӧ вӧзйи.
Мам… Тэ менӧ нинӧмысь он вид.
А бурджык эськӧ медым видін,
Мед элясьӧмнад дойтӧ сывдін,
Эн гусьӧн сьӧлӧм боктӧ нирт.
Мам… Ме коркӧ ачым лоа мам.
Ме тэ моз коркӧ нывлӧн вуна
Да тэ моз ӧткалунӧ суна,
Ӧд сылӧн ме моз зло сям…
Кутькина Ольга. Мам
Мамӧ му вылас зэв шань,
Ставсӧ кужысь-вӧчысь ань.
Мамлы отсасьны ме рад,
Кӧть и ворсыштны нин кад.
Мамӧс радейта ме ёна,
Сійӧ меным медся дона.
Пидзӧс вылас пукышта,
Пельпомӧдыс кутышта.
Лебедев Михаил Мам и челядь // Челядьлы стихъяс (1958)
Коді челядь вӧсна шогсьӧ,
Челядь гӧгӧр зіля ноксьӧ,
Видзӧ найӧс вой и лун,
Ылӧ на дінысь оз мун?
Налӧн муса мамыс!
Коді на вӧсна и олӧ,
Найӧс кывйӧн дойдны полӧ
Сетӧ чӧскыд сёянтор,
Аслыс водзӧссӧ оз кор?
Налӧн дона мамыс!
Челядь быдмӧны кӧ бура,
Оз кӧ лоны пемыд юра,
Коді сэки медся рад,
Оз и аддзыв гажтӧм кад?
Налӧн зарни мамыс!
Оз кӧ челядь шаня овны,
Лёксӧ вӧчны оз кӧ повны,
Коді жугыльтчӧма сэк,
Быттьӧ арся лунӧ кӧк?
Налӧн коньӧр мамыс.
Лодыгин Василий Мамӧ ордын Кывбур // Вуджанін (1993)
Он на чеччӧд менӧ, аслым дыш кӧ,
Наянӧйла нинӧмсӧ ог кыв,
Кӧть и кылӧ, кыдзи мамӧ чышкӧ
Войся лымйӧн тырӧм кильчӧ выв.
Водзын, гашкӧ, кыдз на песас олӧм,
Ог кӧ ӧні, красуйтча нӧ кор?
…Мамӧ ордӧ гӧститны ме волі,
Аски муна шонді петандор.
Лодыгин Василий Мамӧ воис // Мича лун (1986)
Мамӧ видлыны воис,
Кыдзи олам да мый.
Бара вайис тшӧтш со и
Сола тшак да и вый.
Ичӧт пиӧйлы вайис
Чӧскыд мырпом да оз.
Пӧчлы моздорас кайис
Пиӧй кысільӧй моз.
Ставлы нимкодь да долыд,
Сёрни небыд да рам.
Кутшӧм сиктаным олӧм,
Меным висьталӧ мам.
Коді чужис да куліс,
Кодлӧн код серти пӧв,
Кутшӧм вӧлӧма тулыс,
Кутшӧм виччыссьӧ тӧв.
Сӧмын ас йывсьыс сылӧн
Кывйыс шуны оз сюр,
Быттьӧ олӧ да сьылӧ,
Быттьӧ ставыс нин бур.
Ме жӧ зэв бура тӧда:
Мамлы овлӧ и шог.
Сӧмын, корны кӧ мӧда, —
Ог пӧ, пиукӧй, лок.
Кытчӧдз верма пӧ, вола
Тадзтӧ видлыны пыр,
Сӧмын бура пӧ олӧй,
Эн пӧ кӧдзӧдӧй жыр.
Менам олӧмын лоис
Талун шуда зэв лун:
Мамӧ видлыны воис.
Гашкӧ, оз сэсся мун?..
Лодыгин Василий Мамӧлы Сьыланкыв // Рытъя сёрни (1991)
Некод оз веж
Тэнсьыд муслунтӧ, мамӧ,
Тэнлы моз
Некодлы сідзи ог ков.
Сёрнитан зэв нин тай
Лӧня да рама,
Эн на вай омӧльтчы,
дырджык на ов.
Тӧвся бур туй дырйи
бара на вола.
Пывсям да пукалам
тэкӧд ми дыр.
Тӧдмала, сиктыс
кыдз ӧні нин олӧ.
Сы дорӧ муслунӧй
эз на ӧд быр.
Кор менам лов вылын
сьӧкыд да пемыд,
сьӧлӧмӧс бурмӧдан,
кыпӧдан лов.
Кузьӧн мед лоас на,
мамукӧй, нэмыд.
Ловъя кӧ тэ,
меным нинӧм оз ков.
Лодыгин Василий. Меддона морт
Тайӧ му вылас ставыс мем дона:
Эжва ю, парма йир, кыддза рас.
Натӧг сьӧлӧмӧй некор оз шонав,
Натӧг морӧсам быттьӧкӧ тас.
Но донасьыс-донаяс эмӧсь,
Медся донаыс му вылын – мам,
Коді сетіс мем овнысӧ нэмӧс,
Коді сетіс мем овнысӧ сям.
Сэтчӧдз сы йылысь гижа да сьыла,
Кытчӧдз гӧлӧсӧй менам оз быр,
Кытчӧдз вежӧрта, аддза да кыла,
Кытчӧдз бӧрссяньыс гуӧ оз пыр.
Лодыгин Василий Мамӧ сьылӧ // Паса шор (1995)
Катам пыжӧн Эжва йылӧ,
Батьӧ сынӧ, мамӧ сьылӧ.
Бара Ёкыша йир дорӧ
Чӧвтам Сюрукнымлы зорӧд.
Вонас ӧтчыд мамӧ сьылӧ,
Кор ми катам Эжва йылӧ.
Татшӧм гажа ывла вылас
Медъя сьылас, медъя сьылас
Медъя кылас, медъя кылас
Менсьым мамӧс Эжва йылыс.
Лодыгин Василий Мам йылысь сьыланкыв // Мусукасян рӧм (1998)
Артмис сьыланкыв да сьыла,
Сійӧ ылӧсас эз чуж:
Аслам сьӧлӧм пытшкысь кылі,
Сэні вӧлӧм сылӧн вуж.
Припев:
«Медся зіль да медся шань
Менам мамӧй — коми ань».
Татшӧм менам сьыланкыв,
Зэв ӧд кокни, тшӧтш вай сьыв.
Припев:
Тужа-нужасӧ оз казьтыв,
Водзӧ лоансӧ оз тӧд.
Эз и ньӧти видзышт асьсӧ,
Коркӧ тшыг да коркӧ пӧт.
Припев.
Воськовтӧма кильчӧ вылас,
Уджыд сылы век тай эм.
Енмӧй, тэ кӧ менӧ кылан,
Сет вай мамӧлы кузь нэм.
Припев.
Лодыгин Василий. Мам (Гӧрбылясьӧ мамӧ пач вом дорын…) // Мусукасян рӧм (1998)
Гӧрбылясьӧ мамӧ пач вом дорын —
Асывъяснад нокыс сылӧн тыр.
Регыд дзоля воккӧд сёйны корас,
Кодкӧд талун бара узим дыр.
Пызан вылӧ шыд ли, суп ли ваяс,
«Эн жӧ сотчӧй, пӧсь да», — керас сідз.
Дзоля воклы шуас ӧти сайӧ,
Медым няньсӧ понъяслы эз видз.
«Вуграсьны кӧ матӧджыкӧ мунан, —
Меным тшӧктас, — Колюктӧ тшӧтш босьт»…
Ичӧтдырся казьтылӧмыд уна,
Вой шӧр кадӧ сӧмын синтӧ восьт.
Лодыгин Василий. Мамлӧн керка // Ставыс на водзын (1978)
Мамлӧн керка муса Эжва йылын,
Кӧть и воймис, сулалӧ на пыр.
Сэні чужи, сэні бӧрді-сьылі,
Сэні колис кӧмтӧм челядь дыр.
Сэсянь ылӧ велӧдчыны мунлі,
Медым босьтны кутшӧмкӧ да сям.
Мамлӧн керка, некор дзик эз вунлы,
Кыдз эз вунлы ачыс муса мам.
Сэтчӧ ассьым дона пӧлӧс вайи,
Сэні чужис ас кодьым жӧ пи.
Дерт, эз вӧв ас гортын, кыдзи райын,
Но сэн шудсӧ унджык тӧдлім ми.
Мамлӧн керка муса Эжва йылын
Век на ассьыс пӧрысьлун оз кыв.
Лёклы паныд — квайтнан пельӧс сылӧн,
Гӧсьтлы воча — паськыд кильчӧ выв.
Лужиков Александр Мамӧн мыськӧм керка шӧрын… // Енэжшӧрса ордым (1994)
Мамӧн мыськӧм керка шӧрын
югыд, быттьӧ кыддза вӧрын,
быттьӧ, быттьӧ зэрӧм бӧрын
ӧвтӧ купальнича кӧрӧн.
Пемыд ӧшинь дорын кывза
тӧвся рытлысь сьыланкывсӧ.
Лолысь, сьӧлӧм пытшкысь кыла
колипкайлысь асъя сьылӧм.
Мингалева Наталья. Мам
Коді медся-медся шань?
Коді пӄжалӧ век нянь?
Коді мелі, колді рам?
Тайӧ – менам муса мам.
Мишарина Александра. Мамлы козин
Оз на дзоридзавны
Льӧм ни пелысь.
Кыдз пу чойыс.
Тола пиӧд келӧ.
Март тӧлысьыд
Коми муад тӧв на.
Кӧдздӧдлас и сывлас
Уна пӧв на.
Икебана-дзоридз
Вӧчам мамлы.
Абу ичӧтӧсь нин
Тырмӧ сямным.
Мишарина Александра. Мам // Войвыв дзоридз (1980)
Тэнад олӧм эз вӧв кокньыд,
Сьӧкыд кадӧ чужлін.
Тӧдлін нянь кусӧклысь донсӧ,
Уджавны тэ кужлін.
Ылі туйысь локта, паныд
Тэрмасьӧмӧн петан.
Мам, тэ сӧмын сійӧн озыр,
Мый став бурсӧ сетан.
Паршукова Александра. Мам // Небыдик ловшы (2002)
Медся муса, медся бур,
Сыысь донаджык оз сюр.
Сійӧ медся мича менам,
Мамкӧд дзик став сьӧкыд венам.
Сылӧн синмыс — алмаз югыд,
Абу сыысь бурджык другыд.
Сылӧн киыс — небыд шӧвк,
Вом дорыс — кыдз чӧскыд нӧк.
Уджыс мамлӧн киын пуӧ.
— Лёклань эн бергӧдчӧй, — шуӧ.
Велӧдӧ сӧмын бур вылӧ,
Сылӧн радейтӧм пыр кылӧ.
Сійӧ печкас, кыас, вурас.
Ставас киподтуйыс сюрас.
Вотчас, кытшовтас став вӧрсӧ,
Ваяс аскӧд чӧскыд кӧрсӧ.
Зарниысь на дона сійӧ,
Пукта дзоридз сылӧн киӧ,
Шуа: «Сьӧлӧмшӧр менамӧй!
Радейта ме тэнӧ, мамӧй!»
Попов Владимир. Менӧ муса мамӧ. // Би кинь. – 2014. - № 1
Асъя шонді малалӧ
Менсьым чужӧмбанӧс –
Узянінссым чеччӧдӧ
Менӧ муса мамӧ.
Тӧвру бриньгӧ ӧшиньӧ,
Оз жӧ ов сэк рама,
Школаӧ кор мӧдӧдӧ
Менӧ муса мамӧ.
Рытнас, кыдзи-й классаным,
Зільлунӧй мӧй ямӧ,
Ошкас кӧть пятёркаысь
Менӧ муса мамӧ.
Водзын луныс лыдтӧм на…
Пыр на содті сямӧс,
Шаня овны велӧдӧ
Менӧ стрӧг, бур мамӧ.
Попов Владимир Мамӧлы // Вояс ылын и матын (1993)
Он тай кодсюрӧ моз лӧвт,
Висьӧдчан кӧть, тӧда…
Кыдзкар сиктӧ менӧ мӧвп
Нулӧ чизыр ӧдӧн.
Кыдз кӧть турӧбыс оз гарт
Лымсӧ тшӧтш и сэтӧн,
Паныдавны выльдӧм март
Кильчӧ вылӧ петан.
Ловтӧ лэптӧ баддя ді,
Ягыс мӧдлапӧлас.
Весь оз овлы тэнад ки —
Лымсӧ зыртан чӧла.
А кор бара лэптан юр —
Тэнад видзӧдласысь
Гӧгӧр лолӧ шань да бур.
Шондіасьӧ асыв.
И ме кӧсъя-вӧзъя тэд:
Эн на дзикӧдз висьмы.
Мый нӧ сэсся, кӧть и мед
Дыр эг гижлы письмӧ.
Весиг открыткатор
Ыстынысӧ вунлӧ,
Копыртчыла — водз кӧть сёр —
Мартлӧн гӧрда лунлы.
Пач трубасьыд пуркйӧ тшын,
Кыдз быд асыв петлӧ,
Кыла сэсь ме олӧм вын,
Коді-й вирам ветлӧ.
Дорысь дор и помысь пом
Праздник гысӧ кылам.
Сэтчӧдз, мамӧ, лоа том,
Кытчӧдз олан-вылан.
Кӧн кӧть менӧ гаж и шог
Топӧдласны нэмнам,
Ог на ӧтчыд сэтчань лок:
Виччысьысь тэ эм на.
Сотысь-ӧзйӧдысь, кыдз би,
Чолӧм ыста талун —
Гражданин, поэт и пи
Тэнад да страналӧн!
Попов Владимир. Мам дінӧ волан да // Бӧрйӧм кывбуръяс, поэма, комиӧдӧмъяс (1979)
Егор Рочевлы
Мам дінад волан да, бара
Быттьӧкӧ бордъясьлас лов —
Аскилы лэбовтан воча,
Усьӧмысь ньӧти он пов.
Керӧсъяс, сёнъяс и ёльяс
Нӧшта на мусаӧсь сэк.
Кылан, мый ас чужан пельӧс
Увтыртны — зэв ыджыд грек.
Сьӧлӧмад надея туӧ,
Эскӧмыд некор оз берд:
Мам дінсьыд ылыстлысь туйыс
Вайӧдлас унаысь, дерт.
Попов Владимир. Мамӧ // Тувсов йӧлӧга (1960)
Чужан керкакӧд янсӧдчи кор,
Пӧся куимысь окышті мамӧс.
Ньӧжйӧ ылыстчис крут берег дор.
Мамӧ горӧдіс:
— Сэн, чемоданас…
Мый жӧ сэн — сразу эг гӧгӧрво,
Сӧмын дыр на руд кепкаӧн ӧвтчи.
Кор нин ю весьтӧ пуксис сэзь вой,
Вылыс палуба вылысь ме лэччи.
Кывтім ылӧдз нин. Сӧмын тай мам
Быттьӧ бара на кыр йылӧ петіс.
Восьті вӧлисти ме чемодан:
Часлы, видзӧдла, мый жӧ эм сэтӧн?
Кыски ичӧтик юрлӧс ме сэсь,
Кельыдлӧз рӧма кышӧдыс сылӧн.
Быттьӧ енэжӧ мича веж лыс
Вышивайтӧма мамӧй сы вылӧ.
Сылӧн кияслы удж сюрӧ пыр.
Кор нин та вылӧ кад бара сюрис?
Сэсся, мам йылысь думайтігтыр,
Пукті юрлӧсӧй вылӧ ме юрӧс.
Вошис кытчӧкӧ тӧдлытӧг мудз.
Быттьӧ мамӧ сэк малыштіс менӧ.
Быттьӧ шӧпнитіс: «Узь, пиук, узь.
Уна туй на ӧд олӧмад тэнад».
Попов Серафим Мамӧлӧн праздник // Войвыв кодзув (1972 №7)
Этшаджык кӧкъямыс часысь
Узьны мем оз позь,
Но во чӧжнад ӧти асыв
Чечча мамысь водз.
— Мамӧй, — шуа, — видза олан,
Некор ӧд оз вун, —
Лымъя мартын буретш волӧ
Тэнад ыджыд лун!
Тіян, чайта, эм жӧ мамныд,
Менам кодь жӧ бур,
Тайӧ лунӧ сылысь сяммӧй
Окыштны дзор юр.
Попов Серафим Мамӧлӧн ыджыд лун Сьыланкыв // Гажӧдчыштам, челядь! (1994)
Мамӧй, муса мамукӧй,
Тэнӧ Ыджыд Лунӧн
Чолӧмавны кыпыда
некор ме ог вунӧд.
Припев:
Мамӧ, мамукӧй
менам гаж да шуд,
Корсьны пӧсьджык кывъяссӧ
сьӧлӧмысь ог куж.
Припев:
Тэнад мелі киясыд
Шонтӧны пыр менӧ.
Ме дінӧ пӧсь муслуныд
Ывла кӧдзыд венӧ.
Припев.
Дыр тэ ов да радлы пыр
Аслад ыджыд шудӧн.
Некор мед ог аддзывлы
Шоглысь весиг вуджӧр.
Припев:
Мамӧ, муса мамукӧй,
Менам гаж да шуд,
Корсьны пӧсьджык кывъяссӧ
Сьӧлӧмысь ог куж.
Попов Серафим. Мамъясыд сэтшӧмӧсь найӧ… Сьыланкыв // Кывбуръяс (1976)
Мамъясыд сэтшӧмӧсь найӧ:
тӧждлунныс некор оз ям…
Кӧнкӧ лӧз ордымъяс сайын
менӧ тшӧтш виччысьӧ мам.
Мед кӧть и абу нин дзоля —
мичмӧдӧ юрӧс дзор си! —
пыр сылы сэтшӧмӧн коля,
кутшӧмӧс сывъявліс ки.
Муслуныд чинлӧ и ойдлӧ,
ӧти эм медмуса век…
Мамъястӧ лёк кывйӧн дойдны, —
му вылын медсьӧкыд грек!
Попов Серафим. Бур мам
Менам мамӧ медся бур,
Сыысь мусаыс оз сюр.
Менӧ пасьтдӧ и вердӧ,
Шонтӧ аслас сьӧлӧм бердас,
Ичӧт юрӧ кӧдзӧ сям…
Тіян эм-ӧ сэтшӧм мам?
Селиванова Альбина. Мамыд — медся дона Селиванова А. И.-лӧн архив
Мамыд — медся муса,
Мамлӧн сьӧлӧм — шань,
Кытшовт кӧть став Мусӧ,
Мам кодь оз сюр ань.
Мамыд сетӧ олӧм,
Мамыд — медбур ёрт,
Мед кӧть кытчӧ волан,
Мамтӧг — шуштӧм горт.
Велӧдас бур вылӧ,
Оз шу тэд лёк кыв,
Мамлӧн — мыла сьылан,
Мамлӧн — небыд сыв.
Мамлӧн видчӧм вунӧ,
Велӧдыштӧ кӧть,
Тӧждыс сылӧн уна,
Мамыд — абу тьӧт.
Гӧгӧрвоам тайӧс
Зэв ӧд сёрӧн ми,
Мамлы шогсьӧм ваям,
Кывзысьтӧмӧн дзик.
Мамлы ныв-пи — дона,
На вӧсна тӧжд-нок,
Виччысьӧ ӧд ёна,
Кор дыркодь он и лок.
Мыйкӧ век он эшты,
Аслад тӧждыд — тыр,
Выль олӧм он песты,
Мамыд зло дыр.
Мамыд зло томмы,
Орччӧн век зло,
Муса мамтӧг овны
Сьӧкыд зэв на со.
Мам шань кывтӧ аддзас,
Сетас бур сӧвет,
А ми сэк жаляддза
Ыстылам привет.
Мамыд — медся дона,
Сійӧ — медся шань,
Челядь вӧсна ёна
Тӧждысьӧ бур ань.
Селиванова Альбина Мам дінӧ кыв // Зарава — вежа ва (2001)
Муса мамукӧй, донаӧй, мамукӧй,
Ыджыд мывкыда югыд шондіӧй,
Тэнад киясыд шоныдӧсь, небыдӧсь,
Тэнад мӧвпъясыд ясыдӧсь, югыдӧсь.
Тэнӧ сывъяла ме, пӧся окавла,
Сӧмын тэныд шогъясӧс висьтала,
Коркӧ видлывлан, коркӧ велӧдлан,
Сьӧлӧм висьӧмысь нывтӧ пальӧдлан.
Сӧмын тэ водзын нэмӧс ме уджйӧза,
Но ӧд тэ дорысь ог жӧ нин мун йӧзӧ,
Сӧмын тэ жӧ тай быдногыс отсалан,
Веськыд туйсӧ тэ жӧ тай индылан.
Тэ кодь мичасӧ эг на аддзывлы,
Тэ кодь авъясӧ эг жӧ тӧдлы и,
Ов на видза да дыр, муса мамукӧй,
Тэкӧд кыпыдджык асшӧр олӧмӧй.
Тимин Владимир. Мамӧлы // Туйын да гортын (1971)
Тэ коркӧ рӧмпӧштантор
Босьтлін киад
Да шога нюммуныштін:
«Воястӧ он вен».
Дзик нинӧм сэки эг шу,
Тэнад пиыд,
Кӧть чукыръяссьыд
Мыжа тшӧтш и ме.
Тюрнин Н. Мамлы
Пессин, вийсин, эн видз ньӧти асьтӧ,
Чеччывлін тэ кыаыскӧд тшӧтш,
Челядь вӧсна висин – ставсьыс аттьӧ,
Кывйыс тані лӧсьӧлана, стӧч.
Венін ставсӧ, зілин вӧчны бурӧс,
Эн пов уджысь некӧн, миян мам,
Сэтшӧм коми нывбабалӧн сюрӧс –
Удж вылын кӧ збой, то гортын рам.
Шудсӧ тэчин тэ эн ӧти пилы,
Быдмим-верстяммим, кыпӧдчим ми.
Олӧм ордымӧд мӧдӧдны зілин,
Кыдз тэд тшӧктыліс сьӧлӧмлӧн би.
Веськыыд ордымлань писькӧдін туйсӧ,
Сэті восьлавны миянлы дыр.
Кутам ас пытшкын лёксӧ и бурсӧ,
Медым олӧмас пежыс оэз пыр.
Велӧдін тэ сӧмын мывкыд вылӧ,
Чужтін-пестін кужӧмлун и сям.
Тэнад кӧсйӧм кывбурын со кылӧ,
Муӧдз копыр тэныд, муса мам.
Ульянов Александр. Мамӧ Сьыланкыв // Би кинь. – 2018. - № 9
Олӧмыс тэрмасьӧ-мунӧ,
Лун бӧрся кылалӧ лун,
Паметьысь унатор вунӧ,—
Мамӧӧй некор оз вун.
Ола кӧть ылын, кӧть матын,
Гортӧс ог аддзывлы дыр,
Мамӧӧй морӧсын, татӧн,
Сьӧлӧмкӧд йитчӧма пыр.
Муслунтӧ некор он ланьтӧд,
Бур дінӧ пыр сійӧ бур.
Мамуклы, медмуса аньлы,
Кок улӧдз копыртла юр.
Шиликова Зоя. «Мамыд – сійӧ шонді…»
Мамыд – сійӧ шонді,
Пӧсь сьӧлӧмнас шонтӧ,
Мамыд – югыд кодзув,
Туйтӧ индӧ водзӧ.
Мамлысь мелі кывсӧ,
Ныв-пи, шаня кывзӧй.
Ширяев В. Миян мамъяс
Кумачын сиктъяс, каръяс…
Кӧть кодарӧ он мун,
Став мирыс пасйӧ праздник –
Март кӧкъямысӧд лун.
Ми олӧмын мый бурыс,
Дзик ставсӧ сетӧ мам:
Здоровье, пельклун, вежӧр
Да тӧлкӧн олан сям.
Быд висьӧм ӧдйӧ бурдӧ,
Кор мамлысь кылан кыв.
Мам йылысь медым юргӧ
Медмича сьыланкыв.
Ширяев В. Первой «пять»
Садйын олӧм коли бӧрӧ,
Велӧдчыны кад.
Школасянь со воис Боря,
Ачыс вывті рад.
Пыр жӧ сійӧ мамлы киӧ
Сетіс лӧз тетрадь.
Нюмъялігтыр шуис: - Видзӧд,
Талун менам «пять».
Тайӧ «пятьсӧ» быттьӧ ачыс
Пӧлучитіс мам.
Долыд нюмӧн сэки ӧзйис
Сылӧн чужӧмбан.
Юшков Геннадий
Коркӧ лӧнь, а коркӧ зык,
Мамыдлӧн пӧ пиыд кык,
Ичӧт вокыс повны дугдӧ,
Асьсӧ ӧтвылӧ и пуктӧ
Ыджыдыскӧд.
И оз таысь мамыс ӧлӧд,
Ичӧтыс мед збой жӧ вӧлі.
*****
Некод шогтӧ оз на пык,
Мамыдлӧн кӧ нылыд кык.
Шоныд сылӧн небыд киыс,
Тырмӧ сылӧн сьӧлӧм биыс
Кыкнанныслы.
Век кӧть син улас и видзис,
Сійӧн кыкнаныс и мича.
*****
Мамыд, майбыр, оз и лёкав,
Быдмӧны кӧ чоя-вока.
Нюмсӧ мамы доз и сайӧд.
Медся бырыс сылы тайӧ,
Ныв да пи кӧ.
Асывводзнад шытӧм кока,
Узьӧны кӧ чоя-вока.
*****
Тӧждыс мамъясыдлӧн лыдтӧм,
Мамыд тэысь мортӧс быдтӧ.
 |
 |
Комментарии (0)