Год семьи в России: подборка стихов поэтов Республики Коми

2 мая 2024

Национальная детская библиотека Республики Коми им. С.Я. Маршака публикует тематическую подборку стихов коми поэтов Республики Коми, а также коми народных пословиц и поговорок на коми и русском языках.

0iHzzbLGbxU_1.jpg

Подборка посвящена Году семьи в России и предназначена для самостоятельного чтения, чтения детей с родителями и педагогами, а также для заучивания наизусть. Кроме того, произведения и отрывки из них можно использовать при участии в акции «ГИЖдвиж».

Владимир Тимин
«Чужан мулӧн сьыланкывъяс» (юкӧн)

…Сэн, сьылан шыас,
Мамлӧн мелі кыв.
Сэн мӧвпъяс –
Наысь кӧдзыд дырйи шоныд.
Сэн батьлӧн му,
Сэн шӧвк юрсиа ныв,
А тайӧ ставыс
Быдӧнлы зэв дона…

Александра Мишарина
«Эм на аслам чужан горт»

Йӧзлӧн керка, йӧзлӧн му
Оз ков меным, мый кӧть шу.
Эм на аслам чужан горт,
Абу бокӧвӧй ме морт.
Тасянь школаӧ ме ветлі,
Сэсся ылі туйӧ петлі.
Сідзкӧ, шензьыны оз ков,
Гортӧ кыскис менам лов.

Геннадий Юшков
«Ичӧт вок»

Менам вок эм, меысь ичӧт.
Сӧмын сы бӧрся и видзӧд,
Мед оз мыйкӧ бара жугӧд,
Либӧ юрсӧ мед оз люкӧд.
Оз и пуксьыв, помся дурӧ,
А мен сытӧг уджыс сюрӧ:
Тасьті-пань и, пон и, кань и,
Ыджыд пачын черинянь и –
Ставыс ме вылын. А вокӧ
Сӧмын джодждӧра и нокӧ.
Ачыс нинӧм на оз уджав.
Тадзтӧ ӧд ме тожӧ кужа.

Владимир Тимин
«Асъя вӧт»

Вугыр, шатин,
Кӧмтӧм кокъяс,
Зептын нянь да лук,
Кильчӧ вылын дзоля вокъяс –
Ставыс ӧти здук.
Выя шаньга
Вежань ордын,
Рӧзваль даддя тӧв,
Сыктыв весьтын векньыд ордым,
Юр кыскалан вӧв.
Батьӧ кӧчӧс вӧрысь вайӧ,
Мамкӧд вотам чӧд…
Вӧлі челядьдырӧн тайӧ,
Ӧні – дженьыд вӧт.

Серафим Попов
«Пӧрысь мам»

Олан-олан да пӧрысьман!..
Лабич вылын пукалӧ со пӧрысь мам,
Сы водзын важ потан, кага узьӧ,
Байӧдчанъяс мамлӧн кузьӧсь-кузьӧсь…
Вугыртлас тшӧтш ачыс сьылан шӧрас,
Кос кияссӧ войтӧв сэки корас…
Лабич вылын пӧрысь мам…
И некод-нинӧм абу,
Потан кӧв кӧть корсьӧ косьмӧм кабыр…
Кыдз нӧ менам синмӧй тшӧтш оз кӧтась
Пӧрысь мамлӧн синва перъян вӧтысь!

Владимир Тимин

Эз, пӧль-пӧчьяс эз мунны месянь ылӧ,
Эз вошны ыджыд мам, ни ыджыд ай,
И сыын, кыдз ме ӧні ола-выла,
Эм тшӧтш и налӧн тыдавтӧм, но пай…
Ми олам ӧтчыд, огӧ чужлӧй мӧдысь,
Та вӧсна мыжа лоа, ог кӧ шу,
Мый петлі ме зэв важся коми рӧдысь
И татшӧм рӧднас озыр Коми му.

Василий Лодыгин
«Гортын»

И ноддя дорын эськӧ шоныд,
Кор шедас тэныд «воротник»,
Но кутшӧм лӧсьыд гортад воны,
Кор мудзин, жуялін нин дзик.
И чайтан: тайӧ ӧд и райыс,
Кор кайӧ пидзӧс вылӧ кань,
Кор гӧтыр пызан вылӧ вайӧ,
А челядь йирӧны «кӧч нянь».
Зэв чӧскыд шыдыс – пӧсь да сыла,
Но абу панясьӧмӧдз, дерт.
И вӧтнад, буракӧ нин, кылан:
«Эн дурӧй, батьныд шойччас мед».

Геннадий Юшков
«Ыджыд мамӧ»

Ыджыд мамӧ бурнас
Овлӧ сэтшӧм бур!
Окалас и кутлас,
Малыштас юр.
Ыджыд мамӧ скӧрнас
Овлӧ сэтшӧм скӧр!
Колӧ пӧ тэд тасма
Либӧ вӧсни ньӧр.
Нюмъялӧ то сійӧ,
А то ньӧти оз,
Сы вӧсна мы овла
Рам и вильышпоз!

Геннадий Юшков
«Кык пи»

Миян мамӧлӧн кык пи:
Ыджыд воккӧд тайӧ ми.
Воклы дас кык регыд лоӧ,
А ме ичӧт куим воӧн.
Но ме пельӧдзыс нин сылы,
Муртса нюжӧда кӧ сьылі.
Да и абу сы кодь наян:
Пестӧ пырта, ватӧ вая.
Сійӧ быттьӧкӧ оз эшты,
Ставсӧ ме вылӧ век вештӧ.
Ыджыдджык да сюсьӧн кылӧ,
Но и менӧ он нин ылӧд.
Горӧдас кӧ, ог на-й чеччы,
Тойыштнытӧ ог жӧ сетчы.
Та вӧсна и косьӧ волам,
Сэсся бара лӧня олам.
Сӧмын мамӧ панлӧ сёрни:
«Быдмыланныд, шуӧ, кор нин?»

Альберт Ванеев
«Мамлӧн кыв»

Пӧрысь мамлӧн уджын чорзьӧм кияс
Талун мыйкӧ печкыштӧны надз…
Инженерӧн лоис ыджыд пиыс,
Ичӧт пиыс – ас сиктаныс врач.
Пӧчӧс аньӧн колӧ чайтны:
Пияныслы сетіс мывкыд-сям.
Ыдждӧдлыны, либӧ величайтны
Кыкнан писӧ позьӧ.
Тӧдӧ мам.
Тӧдӧ мый оз весьшӧр олӧм овны,
Пыдди пуктӧ налысь сьӧкыд шуд.
Тӧдӧ, наысь яндысьны оз ковмы,
Сӧмын найӧс ошкыны оз кут.
Чирыштас и видас, мыйысь колӧ,
Сӧмын оз жӧ лёкысь быттьӧ, дерт.
Сэтшӧм здукӧ мам водзас чӧв олӧ
Сиктса врач.
И тошка инженер.
Веськӧдас, и пальӧдас, и кывзас…
…Элясьны оз ков, мый ошкан кывъяс
Быд лун мамным миянлы оз шу.

Альберт Ванеев
«Мамлӧн сьӧлӧм»

­­– Мамӧй, ставыс ворсӧ тэнад киын…
Пӧрысьлань кӧть котравнытӧ ланьт.
– Метӧ мый нин…
Кӧсъя ӧні, пиук,
Тэ мед вӧлін писькӧс, уджач, шань.
– Мамӧй, ме тэд вайи мича платтьӧ,
Вайи шоныд шаль.
Эн юась дон…
- Гӧстинечсьыд, пиук, эськӧ аттьӧ,
Но ӧд аслад семьяад вит вом.
– Мамӧй, ветлам шойччыны вай Крымӧ,
Мед кӧть ӧтчыд шонтысьыштан сэн.
­– Чурки-буди, пиук, ог на кынмы,
Юр сюянін, шонтысянін эм.
Кокньыд лун оз корсьлы, нэмсӧ пессьӧ:
Йӧзлань – лышкыд,
Ас пондаыс рам…
Муслунӧн да тӧждлунӧнджык медся
Озыр овлӧ миян муса мам.

Василий Лодыгин
«Аттьӧ!»

Аттьӧсьыд он вур пӧ платтьӧ.
Тӧда: збыльысь ӧд он вур,
Но ме нэмыс шуа аттьӧ
Налы, коді вӧчӧ бур.
Медводз аттьӧ тэныд, мамӧ,
Сыысь аттьӧ, мый ме эм.
Ола тэнад руӧн-сямӧн,
Аслам пӧсьӧн вуджа нэм.
Аттьӧ тэныд, чужан муӧй,
Мый он кӧдзыд киӧн видз.
Тэнад ордым век на нуӧ
Корсьны чуймӧдана мич.
Аттьӧ тэныд, дона ёртӧй,
Мый он метӧг вот ни кый.
Аттьӧ тэныд, дона мортӧй,
Менӧ пыдди пуктан мый.
Аттьӧ, аттьӧ! Ыджыд аттьӧ!
Ставлы вичмӧда пӧсь сыв.
Гажа кывбуръяссьым платтьӧ
Мед и вурас мича ныв.

Александра Мишарина
«Бурсиӧмъяс» (юкӧн)

...Быд пӧрысь мортлы
Челядьсянь – шань кыв.
Быд томлы – муслун,
Ӧта-мӧдӧс видзӧм.
И унджык чужас на
Мед пармаын пи-ныв.
Ӧд нинӧм абу таысь
Бур да мича...

Александра Мишарина
«Чойлы»

Кор сьӧкыд лолӧ сьӧлӧм вылын
И чайтсьӧ, воис меным пом,
Ме тэнсьыд гӧлӧс бара кыла,
И бӧр ме долыдма да том.
Кор ылі туйысь гортӧ вои
И аддзи тэнсьыд чужӧмбан.
И сӧмын сэки гӧгӧрвои –
Ме абу ӧтка, тэ кӧ тан.

Юстина Попова
«Кага видзысь»

Рузум пиӧ тумбырті,
Мамӧ шалльӧн шебрӧді
Дзоля вокушӧс,
Куд кодь пипу потанын
Дзуртан кыдз пу лайканӧн
Качайта сійӧс.
Верда-уда, мед оз бӧрд,
Ӧтнассӧ ме ог эновт –
Ог пет мачасьны.
Узьӧм костас чышка джодж,
Садьмас мыйӧн, ворсам тшӧтш –
Кекӧначасям.
Ӧшинь улӧ петкӧдла,
Ывлаті ме новлӧдла,
Медым лоас ён.
Слӧйма пыртны ва и пес –
Ме нин прамӧй кесйылӧс:
Тшӧктӧм оз ков тон.
Ӧввӧ, ӧввӧ, муса вок!
Тэ эн чужъяв потан бок,
Шебрастӧ эн дзуг.
Мамным муніс удж вылӧ
Асывводзсянь зэв ылӧ,
Рытнас воас тшук.
Сійӧ ваяс чӧскыд оз
Кыкнаннымлы уна роз.
Ӧввӧ, ӧввӧ, бай!
Чӧскыд озсӧ зарнилы
Ведра ставсӧ ӧтнадлы,
Аслым ог босьт пай.
Ӧввӧ, ӧввӧ, бай,
Ӧввӧ, ӧввӧ, бай!

Василий Лодыгин
«Мусаӧй мамӧй»

Кӧні чужлі, сэтчӧ век на вола,
Ӧшинь улӧ петшӧр мед оз пет.
Сэні медся дона мортыс олӧ,
Кевмӧ, Енмыс менӧ видзис мед.
Мусаӧй дай менам мамӧй,
Сьӧлӧмшӧрӧй, дыр на ов.
Шуан кыв да – шогӧй ямӧ,
Петас нюм да – югдӧ лов.
Кепысь-носки внукъясыслы кыӧ,
Мед эз кынмы налӧн ки да кок.
Век на эмышт бандзибъясас кыа,
Абу ёна олӧмыс кӧ лёк.
Век на сійӧ тюрӧ пач вом дорӧ,
Век на сылӧн пызан вылыс тыр,
Век на менӧ тӧлкӧн овны корӧ,
Быттьӧ эз и кольлы челядьдыр.
Мед жӧ сылы луныс лоӧ мича,
Мед жӧ сылӧн кокни лоӧ ун,
Мед жӧ сійӧс асьсӧ Енмыс видзас,
Сетас овны зэв на уна лун.
Мусаӧй дай менам мамӧй,
Сьӧлӧмшӧрӧй, дыр на ов.
Шуан кыв да – шогӧй ямӧ,
Петас нюм да – югдӧ лов.

Геннадий Юшков
«Гозъяыдлы усьлӧ шудыд»

Мед пӧ мортыд гозйӧн олӧ,
Енмыс пуктылӧма мог.
Сійӧн муслуныд и волӧ,
Пӧжӧ ловтӧ уна ног.
Гозъя костад ортӧм кутӧд,
Керкаын кӧ шоныд поз.
Гозъяыдлы усьлӧ шудыд,
Ӧткаыдлы – некор оз.
Мӧдысь томнад он нин лолы,
Ваймӧ ловъяыдлӧн нэм.
Сыысь му вылад и долыд,
Аслад быдтасыд кор эм.
Коді – гӧтыр, коді – верӧс,
Югыд налӧн сьӧлӧм ру.
Гажа нӧрыс, джуджыд керӧс –
Ваӧн гозъятӧ оз ну.
Гозйӧн овнытӧ и колӧ,
Нэмыд кежлӧ босьтны мог.
Гӧтыртӧгыд – абу олӧм,
Верӧстӧгыд – курыд шог.

Геннадий Юшков
«Гозъя»

Авъя нылыд оз кӧсйытӧг ов
Сьӧлӧм вылас бур зонмыдлы воны.
Сэки зонмыдлы чуйдны оз ков
Муса нылыдкӧд гозйӧн и лоны.
Гозйӧн олӧмыд вужйӧдӧм шуд.
Ӧта-мӧдныдлы аски моз югдан,
Но мед асьтӧ он лэптыны кут,
Кодныд уна-ӧ ловнытӧ пуктан.
Енмыс гозъятӧ некор оз ёр,
Видзӧ-ӧлӧдӧ зыкысь да пежысь.
Лоӧ асланыд быдтаныд кор,
Лоӧ му вылас асьнытӧ вежысь.
Мувыв долыдыд сыысь и эм,
Воысь воӧ кӧ югыда олін.
И мед регыд нин помасьӧ нэм,
Тӧдан, мыйла и му вылас волін.
И мед олӧмыс лоӧ век том,
Чужӧм кагаыд лоӧ мед шудӧн.
И оз усьлы мед гозъялы дон,
Коді олӧмсӧ ас вылас кутӧ.

Геннадий Юшков
«Кага моздора ань»

Мед оз лӧгавны энюлов мукӧдыс,
Мед оз скӧрмыны, шуа кӧ тан:
Медся мичаыс таладор югыдас
Кага моздора томиник ань.
Шогӧ усьӧмсьыд кутӧ и дугӧдӧ,
Сетӧ сьӧлӧм, мед нэмтӧ он ланьт:
Медся мусаыс таладор югыдас
Кага моздора томиник ань.
Ӧдйӧ олӧмыс зонъястӧ жугӧдӧ,
Некод абу кӧ мелі да шань.
Медся донаыс таладор югыдас
Кага моздора томиник ань.
Енмыс, вежаыс, быдӧнлы юкӧдӧ
Ыджыд бурысла ватор да нянь.
Медся вежаыс таладор югыдас
Кага моздора томиник ань.

Александра Мишарина
«Мамӧлы»

Некод оз веж
Тэнсьыд муслунтӧ, мамӧ,
Тэнлы моз
Некодлы
Сідзи ог ков.
Сёрнитан зэв нин тай
Лӧня да рама,
Эн на вай омӧльтчы,
Дырджык на ов.
Тӧвся бур туй дырйи
Бара на вола.
Пывсям да пукалам
Тэкӧд ми дыр.
Тӧдмала, сиктыс
Кыдз ӧні нин олӧ.
Сы дорӧ муслунӧй
Эз на ӧд быр.
Кор менам лов вылын
Сьӧкыд да пемыд,
Сьӧлӧмӧс бурмӧдан.
Кыпӧдан лов.
Кузьӧн мед лоас на,
Мамукӧй, нэмыд.
Ловъя кӧ тэ,
Меным нинӧм оз ков.

Ещё больше стихотворений писателей Республики Коми можно найти в зале «Зиль-Зёль» (на втором этаже библиотеки).

Коми народные пословицы и поговорки

Бать-мам сой борд улад лӧсьыд овны. / Под родительским крылом хорошо жить.

Бать-мам дінад олігӧн тӧвсӧ ни зэрсӧ он тӧдлы. / Живя вместе с родителями ненастья не испытаешь.

Мам-батьлысь кыв вуджны оз позь. / Родительское слово нарушать нельзя.

Бур ай-мамыдлӧн челядьыд пыр уджалӧ. / У хороших родителей дети всегда трудятся.

Мамыдлӧн и чунь помыс небыд. / Материнская рука мягкая.

Рака му гӧгӧрыс гӧгӧртӧм да аслас кодь мича пиянӧс абу аддзылӧма. / Ворона обошла вокруг земли и таких красивых детей, как у себя, не видела.

Кӧть катшалӧн, кӧть ракалӧн, быдӧнлӧн аслад челядьыд мича. / Хоть у сороки, хоть у вороны свой ребёнок красив.

Ас кагаыд деньгасьыд дона да тӧварсьыд мича. / Свой ребёнок дороже денег и краше товара.

Мам сьӧлӧм ставсӧ прӧститас. / Сердце матери не злопамятно.

Мамыдлы кӧть кыдз изан – век мам. / Матери как ни смолоти – всё ладно.

Мамыдлӧн бурсиӧмыс му вылын и ва вылын видзӧ. / Материнское благословение оберегает и на земле и на воде.

Батьыд кӧ прамӧй, и ныв-пиыд прамӧйӧсь. / У хорошего отца и дети хорошие.

Кытчӧ айыс воськовтӧ, сэтчӧ и эньыс воськовтӧ. / Куда отец шагнёт, туда и мать ступит.

Эн коль пиыдлы озырлун, а тувъяв сылы мывкыдлун. / Не оставляй сыну богатство, а уму-разуму научи.

Ӧти пи – абу пи, кык пи – джын пи, куим пи – пи. / Один сын – не сын, два сына – полсына, три сына – сын.

Источники информации:

  • Ванеев А. Е. Кывбуръяс. Поэма : на коми яз. / А. Е. Ванеев. ‒ Сыктывкар : Коми кн.изд-во, 1975. ‒ 207 с.
  • Коми шусьöгъяс да кывйöзъяс = Коми пословицы и поговорки / лöсьöдысь Ф. В. Плесовский. – 2-е изд. – Сыктывкар : Коми кн.изд-во, 1983. – 208 с.
  • Лодыгин В. Г. Мусукасян рӧм : Кывбуръяс, висьтъяс, дженьыдик пасйӧдъяс, сьыланкывъяс / В. Г. Лодыгин. – Сыктывкар : Коми книжнӧй издательство, 1998. – 288 л.б. – 5-7555-0620-5.
  • Мишарина А. П. Чужанiнын, гортын : кывбуръяс / А. П. Мишарина ; [лöсьöдiс П. И. Симпелев ; серпасалic Г. Н. Шарипков ; водзкыв Анжелика Елфимовалöн] . – Сыктывкар : Анбур, 2013. – 190, [2] л. б. : порт.
  • Мишарина А. П. Шань сьӧлӧмӧн сьыла [Гижöд] : бӧрйӧм гижӧдъяс / А. П. Мишарина. – Сыктывкар : Коми небӧг лэдзанiн, 2005. – 304 л. б.
  • Попов С.А. Вой кыа улын : Кывбуръяс / С.А. Попов. ‒ Сыктывкар : Коми кн.изд-во, 1988. ‒ 192 л. б.
  • Тимин В. В. Тэӧн ола. Кывбуръяс / В. В. Тимин. – Сыктывкар : Коми небӧг лэдзанін, 2004. – 326 л.б. - (Звёзды Севера). – 5-7555-0801-1.
  • Юшков Г. А. Тӧла додь : Кывбуръяс, висьтъяс, мойдъяс да ворсанторъяс / Г. А. Юшков ; серпасаліс В. А. Клейман. – Сыктывкар : Коми небӧг лэдзанін, 2000. – 336 л.б. : ил. – 5-7555-0693-0.
  • Юшков Г. А. Чукӧсты, Коми му, чукӧсты. Статьяяс, висьтъяс, пьесаяс, кывбуръяс / Г. А. Юшков ; ред. Е. В. Ветошкина ; серпасалiс Ю. Н. Лисовский. – Сыктывкар : Коми Республикаса гижысь котыр, 2010. – 320 л.б. : портр. – 978-5-7934-0361-0.
« Архив новостей

Комментарии (0)

Добавить комментарий